القصيدة هذه بعنوان
" بنت الايام "

أربع سنين البال ماهوب رايق
ما قول لا معطي ولا قول محروم

السالفه بين الوهم والحقايق
يكبر بها التفكير يوم ٍ بعد يوم

لوم ٍ يليق ولوم ماهوب لايق
والناس تحكمها قوانين وسلوم

اضحك وانا من ميلة الوقت ضايق
أدرى مدى ايامي من الشوم واللوم

واصبر وانا للصبر ما كون طايق
حتى عرفت اصحاب وقتي من القوم

توي قبل غيري من الوقت فايق
تركت صحبة كل مغرى وموهوم

وزرعت بدروب الزمان الشقايق
وردٍ عليه من الورق ثوب وكموم

ورفعت نفسي عن جميع العلايق
لو كان ما يجري على العبد مقسوم

والله لو انك على الغيب وايق
يا صاحبي ما قلت غادي ومنجوم

أرقب مراقيب النباء وآتهايق
واشوف خلق ٍ تاكل الزاد مسموم

والشمس ونجوم الليالي غرايق
وطفل ٍ تجيبه بنت الايام مفطوم

عجايبٍ ما حاقها كف حايق
بين العرب والفرس والروس والروم




شعر الأمير عبدالعزيز بن سعود بن محمد آل سعود

قصيدة " غريم الحب "

غريم الحب ماينسا غرامه
وعلى من حب ماينسا سلامه

على الذكرى يعيش العمر كله
عليه من الشقا المبطي وسامه

عذاب الحب للاحباب جنه
ولو هو يحرم العاشق منامه

ولوتكثر على مثلك همومه
يموت اللي عشق مرفوع هامه

زهاك الحب يا فتان دامه
على من حب ماتخشى الملامه

قصيدة "آيات الحب "

مافيه أحد مثلك ولا اظن به زين
مثلك جماله يفتن اللي يشوفه

وكل الحلا من سحر هاروت بالعين
وخدود بآيات الجمال امحفوفه

وسلطان كل العطف بالخلق واللين
مستاثر ٍ بك بين امانه وخوفه

ملكتني بالحب ملك السلاطين
وفي ملك حبك ما لحقني حسوفه

آمر تصرف بي ولا تترك البين
يسطي على قلبٍ عيونك ضيوفه

مكان حبك يا حبيبي بثنتين
هاذي وهاذي والشفوف امعروفه

تاج الحكم والزين بين الحجاجين
وبالفعل زينك كمل الله وصوفه



شعر الأمير عبدالعزيز بن سعود بن محمد آل سعود
الســـامر

قصيدة "حفيد السلاطين "



في كل عيد اعتاد الشعر أن يختال بمعايدة أمير عاصمة الثقافة أم المدن رياض المجد ســـــلمان بن عبد العزيز ولكن هذه المعايدة أكثر خصوصية0

عيدك مبارك يا حفيد السلاطين
يا كاسب الطولات في كل ميدان

انعايدك والعيد للناس عيدين
يابو فهد من فضل ربي والاحسان

كرامة ٍ من واحدٍ له ملبين
الواحد الفرد الصمد عالي الشان

شفاك طمن به قلوب المحبين
ربٍ على خلقه فرض خمس الاركان

من قاصي الشعب السعودي والادنين
انقل تهانيهم على راس ما بان

في نجد مجدك للحضاره عناوين
صارت معالم في بلدنا وعنوان

من زارنا شاف المشاريع بالعين
تطور ٍ ما خبر مثله ولا كان

إلا ومع هذا حريص ٍ على الدين
للعدل نبراس ٍ وللحق ميزان

يا ابن الذي بالطيب ماله ملادين
أنا اشهد انك سيّد العدل وانسان

من حبك لشعبك غدو لك موالين
وكل ٍ حفر في خافقه حب سلمان



ابنك المخلص / عبدالعزيز بن سعود بن محمد آل سعود

قصيدة " عنود ابو تركي "

أجمل ليال العمر بالوصل هالليله
نور الفضل والفضيله عز واليها

من فضل ربي على خلقه وتفضيله
الحسن كله ومجده تجتمع فيها

الليل بوجودهم يا حلو تدليله
ليلة عناق الوفا بأسمى معانيها

لعنود أبو تركي اللي نافل ٍ جيله
تهاني ٍ بأول الفرحه وتاليها

منا عليهم لوجه الله تهليله
وباقة زهور ٍ على الاثنين نهديها

غنوا يغني الفرح معكم على الشيله
تحيا نفوس العرب بأحلى أمانيها

عبدالعزيز العمر انس ٍ وتعليله
وكفٍ يصافح غلاها كف غاليها

خل الفرح تعزف الليله مواويله
ابي نجوم السما معنا تغنيها



كلمات الســـامر

قصيدة "فراق"

هذا فراق ٍ ما ذكر مثله افراق
إلا فراق الموت نهّاب الارواح

فرقا تحل اوزارها وانت مشتاق
يا كيف منها تقضي الوقت مرتاح

وشلون اسلّي خاطري كل ما ضاق
ما همني من جا قبالي ومن راح

فكري بعد من سكرة الحب ما فاق
مما تشوف العين ودعت الافراح

يوم الفراق اليوم وقف على ساق
ما بين مجروح ٍ وما بين جراح

دفنت في حضن الصبر عيد الاشواق
يمكن ظروف الصمت تسعى بالاصلاح

يلومني شخص ٍ من الوصل ما ذاق
ما يعتق المذبوح من عين ذبّاح

راع الهوى مجموعة أشواق واخلاق
يقوم من عثرات الاحباب لو طاح

لو تختلف عذب المشارب والاذواق
ما يلتفت للبارق الحي لا لاح

مشاعر الفرقا على بيض الاوراق
تصورت في ناظري مثل الاشباح



شعر الأمير عبدالعزيز بن سعود بن محمد آل سعود

السامر

قصيدة "طهور "

ملامح سلمان الرياض ترتسم على وجوه أبناء الشعب السعودي الكريم عندما علموا بخبر العملية الجراحية التي اجريت لسموه وتكللت ولله الحمد بالنجاح ، لذلك تقرأ في مجد الوفاء ولاء مكتوب في سطرٍ واحد انه سلمان.

طهور يا حاكم ثرى نجد وقلوب
شعبٍ عليه محقق المجد غالي

كنك لحب قلوبهم دوم مطلوب
مدمي غلا من شعبك اللي موالي

خلق ٍ تنامى حبهم لك على الدوب
شرق ٍ وغرب ومن جنوب وشمالي

ما هو بيدك انك من الناس محبوب
هذا من الوالي عزيز الجلالي

مجدك يشرف بك على كل ماجوب
يا حزام دارك عند عسر الليالي

تقول تقرا في خفا الغيب مكتوب
يرقا يقينك بك على كل عالي

ما مثلك أحدٍ وظف الطيب مندوب
بينه وبين الناس في كل حالي

لك وقفةٍ بالكايده تقضي النوب
وتغير المر المعلقم بحالي

نجد الجسد يابو فهد وانته الثوب
ثوبٍ مطرز عز مابه جدالي

لو الوفا في خدمة الدين لاهوب
اخترت ناره عن نعيم الظلالي


ابنك المخلص عبدالعزيز بن سعود بن محمد آل سعود

قصيدة " سلامتك يابن الفهد "


فرحة شعرية بسلامة وزير الدولة ابن الفهد عبدالعزيز بعدما منّ الله عليه بنجاح العملية والشفاء وقلت:

سلامتك يابن الفهد منتهى الطيب
الله يجيرك من صدوف الليالي

الموقف الكايد بيوم المواجيب
لا قيل هذا اللي عسير المنالي

لك أنت مابه شك ولا بعد ريب
مجدك يشّرف به على راس عالي

لا والذي يعلم خفا السر والغيب
الواحد العالي عزيز الجلالي

ان الوفا لك فوق روس المراقيب
شرق ٍ وغرب ومن جنوب وشمالي

شروق شمسك ما ذكر له مغاريب
ونهار طيبك ما خلق له زوالي

ما بينك وبين المروه مناديب
سلطانها راسك على كل حالي

انت الذي بك للشهامه مقاضيب
عشيرها في كل حال ٍ وحالي

ظلك يظلل عن سموم اللواهيب
بالعز والتقدير باول وتالي

خمس ٍ تسامى بالفضايل عن العيب
طابت لك بحق الوفا والكمالي

عبدالعزيز بن سعود بن محمد آل سعود

قصيدة " كثر العتب "

دخلت في قلبي على كيف كيفك
حكمتني به يوم وسطه توطنت

لقيت به من قاسي الوقت ريفك
وعلى البنات بفرق زينك تسلطنت

وخليتني في مجلس الحب ضيفك
كنك على ملكك بقلبي تطمنت

موسم ربيعك ما يجي مثل صيفك
احسب حساب الوقت والعمر لا هنت

أول يسليني عن الشوف طيفك
واصبحت اشوفك كنك اليوم ما كنت

علم عيونك لاتعلّم بحيفك
حتى ولو انك بروحي تمكنت

لا يسبق ايام المحبه خريفك
وترجع تقول لزاهر الغصن وين انت

كثر العتب يزعج مسامع وليفك
أيقنت وإلا قبل مانساك ما ايقنت


شعر الأمير عبدالعزيز بن سعود بن محمد آل سعود

الســـامر

قصيدة " اهلا بسلطان المكارم وسلمان "


أهلا بسلطان المكارم وسلمان




ولاء الأمة العربية والإسلامية لقدسية هذا الوطن وقادته يتمثل في المواقف الكبيرة من المملكة العربية السعودية تجاههم ومن أبرز هذه المواقف خدمة الحرمين الشريفين وتسهيل قضاء الشعيرة بيسر وسهولة ومحافظة تامة على الأرواح ، وخدمة الإسلام والمسلمين ركيزة من ركائز القيادة المهمة ومن ذلك نستشعر سعادة الجميع بشفاء ولي العهد سلطان الإنسانية وقدومه إلى أرض الوطن المقدس بصحبة أمير نجد وحبيبه سلمان الوفاء0



أهلاً بسلطان المكارم وسلمان
كثر النجوم الساطعه في سماها

الحب سلطان ٍ على مثل سلطان
حبٍ به الروس العنيده تباها

أخو فهد كله مدن فضل واحسان
ومواقفٍ تحمد ويسعد نباها

عمت به الفرحه على كل الاوطان
واستبشر أهل الدار واللي وراها

حب العرب له ما تصوّر ولا كان
حب النفوس اللي شريفٍ غلاها

عقيدته في الحكم من خمس الاركان
منبع على شعب الجزيره نداها

عقيدة التوحيد من حر الايمان
مامونةٍ تنقل كلاها وماها

يا مرحباً به عد ما هل هتان
ترحيبةٍ بالكون يوضي سناها

والحمد لله والشكر عالي الشان
رده لناس ٍ به كبير ٍ رجاها

يا مرحباً باسم ٍ للأمجاد عنوان
تسابقت يمه جميع وحواها

الحب يرقا به على راس ما بان
محبةٍ ربي رفع مستواها

كل البلاد بشوفته وضعها زان
هو عزها هو ذخرها هو حماها

سلطان في هالكون ما مثله انسان
عطشا الكبود بطيب يقطع ظماها

الله خلق سلطان للعز برهان
والا السياسه في يده منتهاها

واكبر دليل ٍ كل ما ثار دخان
الحيه الرقطا توطا جماها

وأبو فهد للحق والعدل ميزان
تاج ٍ على نجد الجزيره زهاها

خلا رياض المجد روح ٍ وريحان
ثبت مكانتها وعلا بناها

انتم لشعب المملكه ذخر واخوان
وما تكبر رجال ٍ قليل ٍ ولاها



ابنك المخلص/ عبد العزيز بن سعود بن محمد آل سعود ـ السامر

قصيدة " يابو فهد تكفى "

السؤال الذي نلمحه في ولاء الوجوه الناصعة البياض فحواه السؤال القائم متى يعود إلى أرض الوطن سلطان الخير وكان هذا الشعر عدسة تلتقط السؤال من الملامح0


سلطان وينك كمل الصبر كله
ما عاد به فالصبر قوه ولا حيل

عجّل ترانا كننا فوق مله
وكن الليالي من بعد غيبتك ليل

إمبهر ٍ لك بالحرمين دله
فنجالها حب الرجال المشاكيل

والبر في نجد العرب زان حله
شوف الفياض اللي تبي علها السيل

سلطان عقبك ما على الدار ظله
والروس من هم الليالي مثاقيل

يا طول ما هلت علينا الأهله
نعدها والشاهد الجدي وسهيل

نبي حجاجك بين شعبك تفله
فالمملكه يا سيدي فلة النيل

يابو فهد تكفا تجمل وقله
نجدك عليه دموع عينه هماليل

نجدك فقد من داير الحول خله
ماله بغيرك شف موجز وتفصيل


ابنك المخلص عبدالعزيز بن سعود بن محمد آل سعود